ගමන නොනිමෙයි ලෝකයේ මේ………..
ගමන නොනිමෙයි ලෝකයේ මේ………..
චන්ද්‍රරත්න මානවසිංහයන් විසින් රචිත, නාරද දිසාසේකර මහතා ගයන මේ ගීතය අහන ඕනෑම කෙනෙකුගේ හිතට දැනෙන්නේ මහත් සැහැල්ලුවක්…
නව පරපුරේ, අළුතින් හතු පිපෙන්නා වාගේ බිහිවන ගීත සහ මියුසික් වීඩියෝ ඇසුවාම/බැලුවාම ඇතිවන්නේ ඇත්තටම කලකිරීමක්. බොහෝ විට හැම ගීතයකම තියෙන්නේ යාන්ත්‍රිකව නිපදවූ එකම නාද රටා / එකම පදවැල් / එකම වචන. එක ගීතයක් දෙතුන් පාරක් ඇසූවිට නැවතත් අහන්න හිතෙන්නේ නෑ, නැවත මතක් වෙන්නෙත් නෑ.
(හැම ගීතයකම තියෙන්නේ මළගෙවල් වල ඇහෙනවා වගේ අඳෝනා… ඔයා නිසා, කඳුළු ඉවරයි, තනිවෙලා අඬඅඬා, ඉවරයක් නෑ කඳුලු දෙනෙතේ, ඉවසන්න බෑ, තනිකලේ නෑ ඔයා, හිත ගොළු වෙලා, නෙතු අතරින් රූරාලා, හීනයේ තනිව මං උන්නා, බලා ඉඳලා ඇතිවෙලා වගේ පොදු වචන මාලාවක්.)
අළුතෙන් බිහිවන බොහෝ ගායක ගායිකාවන් සහ ඔවුන්ගේ ගීත (හැමෝම නොවේ) ඇත්තෙන්ම වැස්සට දළු ලන එරඬු දඬු වගේ. මුලක් හරයක් නෑ. ටික කාලෙකින් වේලිලා යනවා.
මගේ විවේචනය ගැන පරස්පර අදහස් ඇති අය ඉඳීවි. මෙය හණමිටි අදහසක් ලෙස දකීවි. ඒක එකිනෙකාගේ රසඥතාවයේ වෙනස. මේ ගීතය වරක් අසා බලන්න. මෙවැනි ගීත තවත් පරම්පරා ගනනක් නොනැසී පවතීවි. එයයි සත්‍යය..!
………………………………………………….
ගමන නොනිමෙයි ලෝකයේ මේ
පුරුදු ජීවන මංතලේ
ගැටෙන සැප දුක මාරු වී යයි
පුරුදු ජීවන මං තලේ //
වැටෙන මල් පෙති පාවුණාවේ
සුළං රැළි ඔහෙ යන අතේ
යළිත් ගහ කොළ පාළු නෑනේ
රිකිළි නංවා ලියැලැවේ…
ගැටෙන සැප දුක මාරු වී යයි
පුරුදු ජීවන මං තලේ…
ගමන නොනිමෙයි ලෝකයේ මේ
පුරුදු ජීවන මංතලේ….
කොහේද සීතල ජලාශයක රැළි
ගැටී ගැටී එයි සුළං වැදී
අපේම සිරුරේ අපේම දහදිය
නිවී නිවී යයි සුළං වැදී….
ගැටෙන සැප දුක මාරු වී යයි
පුරුදු ජීවන මං තලේ..
ගමන නොනිමෙයි ලෝකයේ මේ
පුරුදු ජීවන මංතලේ..
ගලා බසී දිය පහර සෙමින්
වැලි තලා සදා සමතලා බිමේ
හැපී ගලක යළි සලා වැටුම් දී
නගා නගා හඬ දිවේ දිවේ…
ගැටෙන සැප දුක මාරු වී
යයි පුරුදු ජීවන මං තලේ…
ගමන නොනිමෙයි ලෝකයේ මේ
පුරුදු ජීවන මංතලේ………………
—————————————————
ගී පද – චන්ද්‍රරත්න මානවසිංහ
ගායනය – නාරද දිසාසේකර
සංගීතය – ආර්. මුත්තුසාමි
චිත්‍රපටය – සිකුරු තරුව