“මතකය ඇසුරෙන් සිහියට ගන්නට නිතරම වෙහෙසුනෙමි” ඒ දියණියකගේ කදුළයි, සුසුමයි. සමහර වැළපීම් කඳු පවා සොලවන තරම්ය. නමුත් මේ වැළපීම පියාපතක් පොළවට වැටෙන්නාක් මෙන් සියුම් වැළපීමකි. “අම්මා යැයි කීමට කෙනෙක් නොමැත සොයමි” යන ගී පද පෙළ කන වැටෙන විට නොදැනීම පිටවන සුසුමකි. සංවේදී හඬ මුසුව ඉන්ද්‍රානි පෙරේරාගෙනි. ගීතය මෙතරම් කම්පනයක් ඇති කරන්නේ ගායිකාව ස්වකීය සැබෑ අත්දැකීමකට හඬ මුසුකරන නිසා විය හැක.ඉන්ද්‍රානිට අනුව ඇයට මව්වරු දෙදෙනෙකි. එක් මවක් ඇය වදා සුරතල් ළදරු විය පුරාවට ඈ ළඟ උන් අම්මාය. මවගේ මරණයෙන් අනතුරුව ඈ හදා වඩාගත් වැඩිමහල් සොයුරිය ඇගේ දෙවන අම්මාය. ඇයද මේ වනවිට ඉන්ද්‍රානි හැරගොසිනි.
ඉන්ද්‍රානි “ත්‍රී සිස්ටර්ස්” සංගීත කණ්ඩායමේ සාමාජිකාවකි. “ත්‍රී සිස්ටර්ස්” හි මල්ලිකා, අයිරාංගනී හා ඉන්ද්‍රානි සෙරේරා සැබෑ ජීවිතයේදීත් එකම මව් කුසින් මෙලොව එළිය දුටු ළබැඳි සොයුරියන් තිදෙනාය.
ඔවුන්ගේ දිවියේ බිළිඳුවිය හා ළමාවියේ මුල් අවධියම සංගීත මිහිරෙන් පිරී ඉතිරී ගිය එකකි. ඒ දක්ෂ ගායිකාවක හා පියානෝ වාදන ශිල්පිනියක වූ මවගේ ගායන, වාදන මධ්‍යයේය. පියාද වාදකයෙකු නොවූ නමුත් කලාවට ලැදි සැබෑ රසවතෙකි. ගවුස් මාස්ටර් නමින් මෙරට ජනප්‍රිය වූ මොහොමඩ් ගවුස්ගේ හිතාදර මිතුරෙකි.
මල්ලිකා හා අයිරාංගනී අකුරු කළේ ප්‍රෙස්බිටේරියන් බාලිකාවෙනි. මල්ලිකා අධ්‍යාපනයට අමතරව විද්‍යාලය තුළ බාහිර ක්‍රියාකාරකම් වලද නිරතවූ දීප්තිමත් චරිතයකි. ඇය විද්‍යාලීය ප්‍රසංග වලට සිය නොමඳ සහය ලබාදුන්නාය. ඇය වැඩිදුර සංගීත අධ්‍යාපනය සඳහා හෙළයේ ගාන්ධර්වයා ලෙස හැඳින්වුනු අමරදේවයන්ගේ සංගීත පන්ති සඳහා සහභාගි වූ අතර එමඟින් ඇයට ගුවන්විදුලි වැඩසටහන් වලට සහභාගි වීම සඳහා මාර්ගය විවරවුණි. පසුකාලීනව “සාම”, “දහසක් සිතුවිලි”, “ජීවන ගංගා” යනාදී චිත්‍රපට වලටද පසුබිම් ගායනයෙන් සහය වූ ඇය චිත්‍රපට ක්ෂේත්‍රය තුළද නොමැකෙන නමක් දිනාගත්තාය.
මේ ජීවන ගමන තුළ සැපදුක නිරන්තරයෙන් වෙනස් වන ධර්මතාවයන්ය. වසන්තය මෙන් සතුට සොම්නස පිරී තිබෙන දිවියට දුක දොම්නස පැමිණෙන්නේ නොසිතූ නොපැතූ පරිදිය. උදෑසන මෙන් දීප්තිමත්ව තිබූ සොයුරියන් තිදෙනාගේ දිවිය අඳුරු වූයේ, පිළිකා රකුසා ආදරණීය මවගේ අවසන් හුස්මද පැහැරගත් නිසාවෙනි. එවකට අයිරාංගනී උපත විපත හරිහැටි වටහා නොගත් වයස අවුරුදු හයක කුඩා දැරියකි. මල්ලිකා පාසල් ගමන අවසන් කළාය. ඒ තම බාල සොයුරියන් දෙදෙනා කිසිදු අඩුවකින් තොරව රැක බලාගැනීමේ අරමුණ පෙරදැරිවය. දැරියන් තිදෙනද පියාද සුවිශාල සෙනෙහසක් සිත් දරාගෙන සමුගත් මවගේ නාමයෙන් දිවියට සවිමත්ව මුහුණ දුන්නෝය.
ඉන්ද්‍රානි පළමුව ඇළුම් කරන්නේ නර්තනයටය. නර්තන ශිල්පයේ මහා පෞරුෂයන් වූ චිත්‍රසේන, වජිරා යුවළ යටතේ නර්තනය හදාරන අතරේම මල්ලිකාගේ සංගීත පන්තිය දෙස බලාහිඳිමින් ගායනයද තනිවම පුරුදු පුහුණු වීමට අමතක නොකළාය. කෙසේ නමුත් ඇගේ පාසල් සංගීත ගුරුවරිය වූ පොට්ගාර් මහත්මිය ඇගේ ගායන දක්ෂතාවය හදුනාගත් අතර විදුහල්පතිනිය වූ වැලරි මහත්මිය ඇය තවදුරටත් දිරි ගැන්වූවාය. ඒ හරහා ඇය පාසල් සිසුවියකව සිටියදීම ස්වකීය පාසල නියෝජනය කරමින් ලංකා ගුවන්විදුලියේ ඉදිරිපත් කිරීම් සිදුකිරීමට මාර්ගය එළි පෙහෙළි විය.
ඩැල්රීන් විසින් “ෆයර් ෆ්ලයිස්” හි සහය ගායිකාවක ලෙස තෝරාගනු ලැබූ ඉන්ද්‍රානි වර්ෂ 1969 වනවිට “මූන් ස්ටෝන්ස්” හා එක්ව සිය ප්‍රථම ගීතය ලෙස අදටද අතිශය ජනප්‍රිය “දිල්හානි” ගැයුවාය.
පවුලේ ළාබාලතමයා ලෙස පවුලේ සුරතලයට නිරන්තරයෙන් පාත්‍ර වූ “ජීන්” හෙවත් අයිරාංගනී, ශේෂා පළිහක්කාර යටතේ නර්තනයද මිරැන්ඩා හේමලතා යටතේ රංගනයද හැදැරූ අතර එය ඇය වේදිකාව මත මෙන්ම තිරයේද දැක්වූ දස්කම් වලට මග පෑදූ බව නොරහසකි. ඒ අතරින් අතළොස්සක් ලෙස “සාම”, “ආදරයයි කරුණාවයි”, “දහසක් සිතුවිලි “ ආදී නිර්මාණ දැක්විය හැක.
පියාගේ පූර්ණ සහය හා අපරිමිත සෙනෙහස මධ්‍යයේ තමන්ගේම සංගීත කණ්ඩායමක්, ශ්‍රී ලාංකේය පොප් සංගීත ක්ෂේත්‍රයේ ප්‍රථම කාන්තා සංගීත කණ්ඩායම පිහිටුවීමේ විප්ලවීය වෙනස සිදුකළ ඔවුන් පළමුව ස්වකීය සංගීත කණ්ඩායමට “බ්ලූ බර්ඩ්ස්” යන නම ලබාදුන්නෝය. නමුත් පසුව එය “සුපර් ස්ටාර්ස්” ලෙසද අවසානයේදී “ද ත්‍රී සිස්ටර්ස්” ලෙසත් වෙනස් කරන ලදි. 1969 දෙසැම්බර් 31වනදා “හොටෙල් තැප්‍රොබේන්”හි (අද_ ග්‍රෑන්ඩ් ඔරියන්ටල් හොටෙල්– GOH) සිය ප්‍රථම ඉදිරිපත් කිරීම සමඟින් “ද ත්‍රී සිස්ටර්ස්” සිය දොරට වැඩුම සනිටුහන් කරන ලදි.
“සූරිය” ලේබලය යටතේ සිය ප්‍රථම ගීත ඇල්බමය “ද ත්‍රී පෙරේරා සිස්ටර්ස් ඉන් හාර්මනි” ඉදිරිපත් කිරීමට තරම් භාග්‍යවන්ත වූ “ද ත්‍රී සිස්ටර්ස්” එහි අඩංගු ව තිබූ “කළු කෙල්ල”, “අක්කලා නංගිලා” යනාදී ගී සමඟ අදටද ශ්‍රී ලාංකේය රසික රසිකාවියන් අතර අතිශය ජනප්‍රියය.
වර්ෂ 1970 වනවිට “ද ත්‍රී සිස්ටර්ස්” ස්වකීය දෙවන හා තෙවන ඇල්බමයන්ද “සූරිය” ලේබලය යටතේම නිකුත් කරන ලදි. ඒ අතරින් “ද ත්‍රී සිස්ටර්ස් අ-ගෝ-ගෝ” ; “මල්වගේ අපි”, “වාසිටි කෙල්ලෝ”, “සමරු පොත”, “ඉඳුනිල් මැණික” යනාදී ගී සමඟ ජනාදරයට පාත්‍ර වූ අතර “ද ගෝල්ඩන් චයිම්ස්” වාදන සහය ලබාදුන් “ද සෙන්සේෂනල් ත්‍රී සිස්ටර්ස්” අයිරාංගනී ප්‍රධාන ගායකාවක ලෙස දොරට වැඩි ප්‍රථම අවස්ථාවද විය. ඒ “මේ ගීය මම ගයන්නේ” ගයමිනි.
සජීවී “සූරිය ප්‍රසංග” වල නැතිවම බැරි සංගීත කණ්ඩායමක් බවට පත්වූ “ද ත්‍රී සිස්ටර්ස්” පසුව ගුවන්විදුලියේ “සූරිය ෂෝව්” හරහාද රසික රසිකාවියන්ට සමීප වූ අතර ඔවුන්ගේ පටිගතකිරීම් වලට එම්.කේ.රොක්සාමි (වයලීන්), රාජ් ජලල්දීන් (ගිටාර්), කුමාර් මොල්ලිගොඩ (සැක්සෆෝන්), බෙලා කර්ක්ස් (සැක්සෆෝන්), හා ලතිෆ් මිස්කීන් (ට්‍රම්පට්) වාදනයෙන් ලබාදුන් සහය අමතක කළ නොහැක.
වරෙක “ද මූන් ස්ටෝන්ස්” හා “ද ත්‍රී සිස්ටර්ස්” එක්ව එක් සංගීත කණ්ඩායමක් බිහිකිරීමේ උත්සාහයක් පිළිබඳවද රාවයක් විය. නමුත් වර්ෂ 1987දී සිදුවූ මල්ලිකාගේ අකල් මරණය තෙක් දශක දෙකක් පුරාවට තනිව අභිමානවත් ගමනක නිරතවූ “ද ත්‍රී සිස්ටර්ස්” පියාගේ උපකාරය සහිතව තමන්ටම අනන්‍ය වූ “අයි.එම්.අයි” පටිගතකිරීම් ලේබලයද නිමවා ගත් අතර ද්‍රවිඩ බසින් ගී ගයමින් සහෝදර ද්‍රවිඩ රසික රසිකාවියන්ගේද නොමඳ සෙනෙහසට පාත්‍රවන ලදි.
මල්ලිකාගේ අකල් මරණයෙන් අනතුරුව “ද ත්‍රී සිස්ටර්ස්” ප්‍රසංග වේදිකාවට යළි නොපැමිණි අතර ඉන්ද්‍රානි තනිව සංගීත ලොව තුළ ස්වකීය ගමන යෑමට තීරණය කළ අතර වරින් වර අයිරාංගනීද ඇයට එක්වූවාය. වර්ෂ 2000දී ක්ලැරන්ස්ට උපහාර පිණිස වේදිකා ගතවුණ “ඇනස්ලි ඇන්ඩ් ඉන්ද්‍රානි ඉන් කොන්සර්ට්” හරහා සිය දොරට වැඩුම සනිටුහන් කරන මල්ලිකාගේ දියණිය හිරන්‍යා, ඉන්ද්‍රානි හා අයිරාංගනී සමඟ එක්ව “ද ත්‍රී සිස්ටර්ස්” මතකය නැවතත් මෙරට රසික ජනතාව අතරට ගෙනයන ලදි. ඇටමිඳුළු කා ගිය සැබෑ සොයුරු පෙම මෙරට රසික රසිකාවියන්ට ගීයෙන්ම කියාදුන් “ද ත්‍රී සිස්ටර්ස්” මතකය තවත් දශක ගණනාවකට අපගේ මතක පොතින් ගිලිහී නොයනු නොඅනුමානය.
සංස්කරණය : මලින්ද සෙනෙවිරත්න
පරිවර්තනය : නවෝදා දයාකාන්ත
The Three Perera Sisters in Harmony