විශිෂ්ටයින්, සුවිශිෂ්ටයින් හා අතිවිශිෂ්ටයින් සමඟින්;“ද සුපර් ගෝල්ඩන් චයිම්ස්”
ආරම්භක වර්ෂය : 1966
ආරම්භක සාමාජිකයන් : ක්ලැරන්ස් විජේවර්ධනගේ, ඇනස්ලි මාලවන, ඩික්සන් ගුණරත්න, පෝල් පෙරේරා, ශ්‍රී කාන්ත දසනායක, රොහාන් ගුණවර්ධන
ප්‍රභේදය :සිංහල පොප් සංගීතය
රුවන් පුරයෙන් ගෙන ආ මිණි කැටය “ද මූන් ස්ටෝන්ස්” හැරගිය ක්ලැරන්ස්, “ද ගෝල්ඩන් චයිම්ස්” පිහිටවීමෙහිලා සුවිශේෂී මෙහෙවරක් ඉටුකළ අතර ඇනස්ලි “ද මූන් ස්ටෝන්ස්” නායකත්වය හොබවමින් එය රැක ගැනීමෙහිලා සුවිශේෂී මෙහෙවරක නිරතවූවේය.
දිනෙක සිය ප්‍රසංගයක් සඳහා ඇනස්ලිට ඇරයුම් කළේ ක්ලැරන්ස්ය. ප්‍රසංගය අවසානයේ කුඩා ප්‍රිය සාදයකි, සොඳුරු පිළිසඳරකි. එය සංවිධානය කරන ලද්දේ ගිටාර් වාදන ශිල්පියා වූ සුමිතුරු ඩික්සන්ය. කලාව වෙණ තත් මෙන්ම හද තත්ද හඬවයි. සාකච්ඡාව අවසන් වූයේ නොසිතූ නොපැතූ ලෙසටය. නමුත් එය අතිශය ප්‍රීතිමත් අවසානයකි. නවතම සංගීත කණ්ඩායමක් බිහිකිරීමේ අඩිතාලම එම සාකච්ඡාවය. වසර 1973ය. “ද සුපර් ගෝල්ඩන් චයිම්ස්” ; කණ්ඩායමට මැනවින් ගැලපෙන නමක් පුරුදු පරිදි ජෙරාල්ඩ් වික්‍රමසූරියගෙන් යෝජනා වූ අතර “ද සුපර් ගෝල්ඩන් චයිම්ස්” මෙලෙසින් සිය සමාරම්භක පියවර තැබීය.
ඩික්සන් ලීඩ් ගිටාරය වැයූ අතර, රොහාන් ගුණවර්ධන බේස් ගිටාරයද, පෝල් පෙරේරා කී බෝර්ඩයද, ශ්‍රී කාන්ත දසනායක ඩ්‍රම්ස් ද වාදනය කළ අතර සුපුරුදු පරිදි ගායනය ක්ලැරන්ස් හා ඇනස්ලි යුගලයෙනි.
වැඩි කාලයක් ගත නොකරම, “ද සුපර් ගෝල්ඩන් චයිම්ස්” වර්ෂ 1973දීම සිය ප්‍රථම ඊ.පී පටිගතකිරීම සිදුකරන ලදි. “සූරිය” ලේබලය යටතේ “ද සුපර් ගෝල්ඩන් චයිම්ස් ඇට් කතරගම” (කැටලොග් අංක සී.එච්.බී.032) කලා ක්ෂේත්‍රයට තිළිණ වූ අතර එහි වූ “කඳ සුරිඳුනි”, “සීත සුළඟක්”, “සතුට සැනසුම”, “පෙන බුබුළ” යනාදී ගීත එක් රැයින් මෙරට ජනප්‍රිය ගීත බවට පත්විය.
අදටද රසික රසිකාවියන් අතර අතිශය ජනප්‍රිය ගීතයක් වන “කඳ සුරිඳුනි” පද හා නාද ගෙත්තම ක්ලැරන්ස්ගෙනි. ඒ ශ්‍රී කාන්තගේ පියාගේ ඉල්ලීමකට අනුවය. ඒ වනවිට හදිසි අනතුරකට ලක්ව සිටි ශ්‍රී කාන්තට ඉක්මන් සුව ඉල්ලා මුරුගන් දෙවිඳුන්ට කරන ඉල්ලීමක් ලෙස ක්ලැරන්ස් එය ගායනා කළේය.
ඔවුන්ගේ දෙවන ඊ.පී. පටිගතකිරීමද “සූරිය” ලේබලය යටතේම සිදුවුණි. ක්ලැරන්ස්, ලාංකිකාගේ අළුත උපන් සිඟිත්තා වෙනුවෙන්ම රචනාකළ “සිහින පැතුම් විමානේ” වැනි ගී එහි ජනප්‍රියත්වයට හේතු වූ බව නොරහසකි.
ඉන්පසුව ඔවුන් “ලෝටස්” ලේබලය යටතේ සිදුකළ එල්.පී. පටිගතකිරීමටද “ගමෙන් ලිවුමක්”, “වන බඹරෝ” , හා හා හොරේ”, “කිරි මුහුද”, “සුදු මැණිකේ”, “උඩරට නිළිය”, “කියන්න සුළඟේ” වැනි අතිශය ආකර්ෂණීය ගී ඇතුළත් වූ අතර ගායනයෙන් අනිල් භාරති, ඉන්ද්‍රානි පෙරේරා, ලිලන්ති කරුණානායක වැන්නවුන්ගෙන් ලැබුණු සහයෝගයද අමතක කළ නොහැක.
“ද සුපර් ගෝල්ඩන් චයිම්ස්” ගමනට සහයදුන් තවත් අතිදක්ෂ ශිල්පීන් ගොන්නකි. ඒ අතර කොන්රඩ් ගුණරත්න (බේස් ගිටාරය), රුක්ෂාන් පෙරේරා (කී බෝර්ඩ්), ලයසිං ද සිල්වා (බේස් ගිටාරය), නිමල් පෙරේරා (ඩ්‍රම්ස්), චන්ද්‍රලාල් ෆොන්සේකා (බේස් ගිටාරය), කුමාර් පීරිස් (කී බෝර්ඩ්), සුනිල් මාලවන (බේස් ගිටාරය), සූරියකුමාර් වීරසිංහම් (කී බෝර්ඩ්), පීටර් ද අල්මේදා (බේස් ගිටාරය), නිමල් පුංචිහේවා (ඩ්‍රම්ස් හා කොංගා) වැනි ශිල්පීන් අමතක කළ නොහැක.
වර්ෂ 1976දී “කතරගම ඉන්ස්ටෘමන්ටල්ස් බයි ද සුපර් ගෝල්ඩන් චයිම්ස්” සමඟ නැවතත් “සූරිය” ලේබලය යටතේ කළඑළි බසින “ද සුපර් ගෝල්ඩන් චයිම්ස්” එයට “කතරගම” හැරුණු විට “මොරටුව”, “ඇසේ මධුර” හා “දුවනි” වැනි ගීද ඇතුළත් කළේය.
ස්වකීය නිර්මාණ කලා ක්ෂේත්‍රයට තිළිණ කිරීමෙන් නොනැවත “ද සුපර් ගෝල්ඩන් චයිම්ස්”; මිල්ටන් මල්ලවාරච්චි, ඩැල්රීන් සුබි වැනි බොහෝ විශිෂ්ට ගායකයන්ට සංගීතයෙන් ලබාදුන් සහයද අමතක කළ නොහැක්කකි.
හැත්තෑව දශකයේ මධ්‍ය භාගය වනවිට ශ්‍රී ලංකා ගුවන්විදුලි සංස්ථාවේ සිංහල හා ඉංග්‍රීසි සේවයන් සියල්ලේම ගීත දර්ශක වල ඉදිරියටම පැමිණි “ද සුපර් ගෝල්ඩන් චයිම්ස්” වර්ෂ 1976දී “පොප් ඇන්ඩ් ටීන් ෆෑන්ෆෙයාර්” මඟින් පැවැත්වූ ඡන්ද විමසුමෙන් ශ්‍රී ලංකාවේ ජනප්‍රියතම පොප් සංගීත කණ්ඩායම බවට පත්වීමේ භාග්‍යයද දිනාගන්නා ලදි.
වර්ෂ 1978 වනවිට නැවතත් “සූරිය” සමඟ එක්ව “දිලීප”, “කෝමල ලතාවෝ”, “විකසිත හදමල්”, “සමාවන්න” වැනි ගීත ලාංකේය කලා ක්ෂේත්‍රයට දායාද කළ අතර 1978 අග භාගය වනවිට ක්ලැරන්ස් ස්වකීය සංගීත ගමනේ ඉතිරිය තනිව යෑමට තීරණය කරනලදි. ඇනස්ලිද මේ වනවිට විවාහපත් වීමට තීරණය කර තිබූඅතර තම ඉදිරි ගමන ඇගළුම් ක්ෂේත්‍රය හරහා සිදුවූයේ නම් මැනවැයි තීරණය කරනලදි. ඒ වර්ෂ 1979දීය. ක්ලැරන්ස්ගෙන් හා ඇනස්ලිගෙන් හිස්වූ ස්ථානය පුරවමින් චන්ද්‍රලාල් ෆොන්සේකා නායකත්වයේ වගකීම තමාගේ උරමතට ගත්තේය.
තම ගමන නොනැවත ඉදිරියට යමින් වර්ෂ 1982දී චන්ද්‍රලාල්, ඩික්සන්, කුමාර්, නිමල් හා මයික් ස්විස්ටර්ලන්තයේදී “ද සුපර් ගෝල්ඩන් චයිම්ස්” නාමය “සුපර්” ලෙස කෙටිකරගනිමින් ප්‍රසංග පැවැත්වූවෝය. ගමන ඉන්ද නොනැවතිණි.
වර්ෂ 2015 අප්‍රේල් මස 10 වනදා බණ්ඩාරනායක සම්මන්ත්‍රණ ශාලාවේ පැවති සමුගැනීමේ ප්‍රසංගයකි. හඬ විජය කොරයාගෙනි. විශිෂ්ටයින්, සුවිශිෂ්ටයින් සමඟින් අතිවිශිෂ්ටයින්ද වේදිකාවට ගෙන ආ “ද සුපර් ගෝල්ඩන් චයිම්ස්” එලෙස නැවතත් එකට එක්විය.
පරිවර්තනය : නවෝදා දයාකාන්ත
ගීත ඇල්බම
