වේදිකාව මත ගී ගයන කුඩා සුරතල් දැරියකි. ඇය මයික්‍රෆෝනයට තරම්වත් උස නැත. නමුත් ඒ ගැන කිසිඳු තැකීමකින් තොරව; කිසිඳු චකිතයකින් තොරව “කොන්ද නමාගෙන හැරමිටි ගහගෙන” ගයන්නී, ඇය ශිරෝමි ප්‍රනාන්දු නම් වූවාය.
වර්ෂ 1960 මැයි මස 21 වනදා මෙලොව එළිය දුටු ඇය ස්ටැන්ලි හා ස්වීටි ප්‍රනාන්දු යුවළගේ එකම දරුවාය. ඇයට අවුරුදු පහක් වනවිට පියා සදහටම ඇය හැර ගියද, ආදරණීය මවගේ, මිත්තණියගේ මෙන්ම මැක්ස්වෙල්, රොනල්ඩ්, මිල්රෝයි, හා ක්‍රිස්ටි යන මාමාවරුන් සිවුදෙනාගේ සෙනෙහෙ කැදැල්ලේ නොමඳ සෙනෙහසට හිමිකාරිය වූවාය.
ඒ වනවිට ලාංකේය ප්‍රසංග කලාවේ අති ආකර්ෂණීය චරිතයක් වූ ඇය ජනප්‍රිය “සූරිය” සජීවී ප්‍රසංග වල මෙන්ම “සූරිය රේඩියෝ ෂෝ”හී ද නැතිවම බැරි චරිතයක් බවට පත්වූවාය.
කොටහේන යහපත් එඬේරාගේ කන්‍යාරාමයේ අකුරු කළ ඇය වයස අවුරුදු හයක සිඟිති දැරියකව හිඳියදීම සිය ප්‍රථම ප්‍රේක්ෂක ඉදිරිපත් කිරීම කොළඹ 07 ශාන්ත බ්‍රිජට් කන්‍යාරාමයේ පැවති “ආසිරි කුසුම්” හරහා ඉදිරිපත් කළාය. මැක්ස්වෙල් ධර්මරත්න හා “ලා සිලෝනියාස්” හි නොයෙල් රණසිංහ එක්ව සංවිධානය කළ “ආසිරි කුසුම්” හි සංගීත කණ්ඩායම් ගොන්නක් අතර තනිව ඉදිරිපත් කිරීම් කළ එකම කලාකාරිය ඇය වූවාය. ඇගේ සහජ දක්ෂතාවය හඳුනාගත් ඇගේ මෑණියන්ද, මිත්තණියද, මාමාණ්ඩිය වූ මෙල්රෝයි ද ඇගේ ගීයක් පටිගතකිරීම කෙරෙහි අවධානය යොමුකළද එය සාර්ථක වන බවක් නොපෙනුණි. ගෞරි සංස්ථාවේ පැට්‍රික් කුරේරා ද, දළුගම “සරසවි ස්ටූඩියෝ” හි සංගීත අධ්‍යක්ෂ ආර්.ඒ. චන්ද්‍රසේනද අවිවාදයෙන් ශිරෝමිගේ හැකියාව පිළිගත් නමුත් පටිගතකිරීමක් සඳහා තවත් අත්දැකීම් ලබාගත යුතුයැයි තීරණය කරන ලදි. සූරිය පටිගතකිරීම්හි ජෙරාල්ඩ් වික්‍රමසූරියගේ අදහස වූයේද මේ ඒ සඳහා සුදුසුම මොහොත නොවන බවයි.
කෙටිකලකින්ම “බේබි ශිරෝමි” ලෙස ජනාදරයට පාත්‍ර වූවාය. එහිදී ශිරෝමි ගායනා කළ “කොන්ද නමාගෙන හැරමිටි ගහගෙන” ගීතය එක් රැයින් මෙරට ජනප්‍රිය ගීතයක් බවට පත්වූ අතර බොහෝ ළමා වැඩසටහන් වල නිරන්තරයෙන් වාදනය විය. ඉන් නොනැවත “ගීත දහර” වැඩසටහනට පවා “කොන්ද නමාගෙන” ගීතය එක්වීම ගීතයේ ජනප්‍රියතාවය මනාවට කියාපායි.
ශිරෝමිගේ හැකියාව මනාව හඳුනාගත් ජෙරාල්ඩ්ගේ ආරාධනායට අනුව වර්ෂ 1971දී ඇය සූරිය ලේබලය යටතේ ස්වකීය ප්‍රථම ගී එකතුව “ කොන්ද නමාගෙන” ශ්‍රී ලාංකේය ප්‍රේක්ෂකයාට තිළිණ කළාය. මාස තුන හතරක් වැනි කෙටි කලක් තුළ පන්දහසකටද අධික පිටපත් සංඛ්‍යාවක් අලෙවි වූ එහි “කොන්ද නමාගෙන” ගීතයට අමතරව “අම්මා”, “සකල බුජං”, “හඳහාමී” යනාදී ගී ද ඇතුළත් විය.
නැවතත් වර්ෂ 1971දී “බේබි ශිරෝමි ඩස් ඉට් අගේන්” හා වර්ෂ 1973දී “මීට් ශිරෝමි – ක්වයිට් අ ලේඩි නව්” සූරිය ලේබලය යටතේ දැයට තිළිණ කළාය. මේ ගී එකතුවල ගී පද,තනුව මෙන්ම සංගීත අධ්‍යක්ෂණයද මුළුමනින්ම ඇගේ මාමාණ්ඩිය වූ මෙල්රෝයි ධර්මරත්නගෙනි. ඉන් නොනැවත සිය තවත් මාමාණ්ඩියක වූ මැක්ස්වෙල් සමඟ “බොරුවට අඬ අඬ” ගීයද සූරිය ලේබලය යටතේම ගැයුවාය.
පසුව “නිව් සවුන්ඩ්” ලේබලය යටතේ “බලන බලන කාලේ”, “රජකම”, “සුදු අක්කේ” හා “ඩියර් ස්වීටි” යනාදී ගී ද “ස්ටෙලා” ලේබලය යටතේ “ජේසු බබා”, “අතීතයයි”, “කිත්තා පනත්තා” හා “මාමා” යන ගීතද ගයන ලදි. එන්. ෂන්මුගලිංගම් විසින් ගී පද ගෙත්තම් කළ “මාමා” ඈ පටිගතකළ පළමු ද්‍රවිඩ ගීතය ලෙස ඉතිහාසගත විය.
ඒ හැරුණු විට “සිල්වර්ලයින්” සමාරම්භක ඊ.පී. පටිගතකිරීමට මිල්ටන් මල්ලවාරච්චිට අමතරව ගී ගැයීමේ භාග්‍යය දිනාගත්තාය. ඒ “අඬන්න එපා” හා “මං සමනලයෙක් වෙලා” යන ගී ද්විත්වය ගයමිනි. මෙල්රෝයි “අඬන්න එපා” ගී පද ගෙත්තම් කළේ ලියුකේමියා රෝගයෙන් පීඩා විඳි ශිරෝමිගේ යෙහෙළියකට උපහාර පිණිසය. තමාගේ මවගෙන් නොහඬන ලෙස ඉල්ලා සිටින රෝගාතුර සුරතල් දැරියගේ ඉල්ලීම ලාංකේය රසික රසිකාවියන්ගේ හදවත් සසල කළ අතර ඒ දැරිය ශිරෝමි යැයි වරදවා වටහාගත් රසික රසිකාවියන් කදුළු සලමින් ශිරෝමිගේ නිවසට එක්රොක් වූවෝය.
සංගීත ක්ෂේත්‍රයේද චිත්‍රපට ක්ෂේත්‍රයේද ස්වකීය නාමය රැන්ඳූ ශිරෝමිට තම ජීවන සහකරුවා ලැබෙන්නේ නොසිතූ නොපැතූ ලෙසටය. සුනිල් වැලිකල දීර්ඝ කාලයක සිට ශිරෝමිගේ ගායන දිවියේ උන්නතියම පැතූ සැබෑ රසිකයෙකි. දිනක් ඇගේ නිවසටම පැමිණ ඇය හමුවීමේ භාග්‍යය ලබාගත් ඔහු “ශිරෝමිස් ෆෑන් ක්ලබ්” පිහිටවීම සඳහා යෝජනාව ගෙන එන්නේය. කල්යත්ම ඇගේ මාමාවරුන්ගේ ආශිර්වාදය මධ්‍යයේ ඔහු ගෙන ආ තවත් යෝජනාවකි. ඒ දිවි ඇතිතුරාවට සෙවනැල්ල සේ වෙන් නොවී එකට එක් ව ගමන් කිරීමේ යෝජනාවයි. ශිරෝමි විවාහයෙන් ඒ යෝජනාව ස්ථිර කළ අතර දියණියක හා පුත්‍රයෙකුද ඔහුට තිළිණ කළාය.
වර්ෂ 1987 දී සිය පවුල සමඟ කැනඩාවට සංක්‍රමණය වූ ඇය “නිව්බරෝව් මොන්ටිසෝරි කොලේජ්” අධ්‍යාපන ආයතනයෙන් උපාධිය දිනාගත්තාය. ඉන් උපරිම ප්‍රයෝජනය ලබාගනු වස් “කෙනඩි මොන්ටිසෝරි” පෞද්ගලික ආයතනය හා සම්බන්ධව කුඩා දරුවන්ට මග නොමග කියාදුන්නාය. අද වනවිට කැනඩාවේ ඔන්ටාරියෝ මාකම්හි දිවි ගෙවන ඇය වර්ෂ 2003 දී ඉතා අවාසනාවන්ත සිදුවීමකට මුහුණ දුන්නාය. ඒ පිළිකා රෝගයෙන් පීඩාවිඳි ඇගේ ආදරණීය සැමියාගේ මරණයයි.
වර්ෂ 2008 දෙසැම්බර් මස 27 වනදා මරදාන එල්ෆින්ස්ටන් රඟහලේ පැවති “ධර්මරත්න බ්‍රදර්ස් ෆෝටි ඉයර්ස් ඉන් මියුසික්” සමඟින් කලකට පසු මෙරට ප්‍රේක්ෂකයන් හමුවට පැමිණි ඇය එදින සිය දියණිය වූ හෂනි හා මැක්ස්වෙල්ගේ දියණිය වූ නෙළුම් සමඟද ගී ගැයුවේ අතීතය නැවතත් අප දෑස මානයට ගෙන එමිනි.
බේබි ශිරෝමි කී පමණින් අපගේ සිහියට නැගෙන්නේ කුඩා සුරතල් දැරියකි, “කොන්ද නමාගෙන හැරමිටි ගහගෙන”, “අම්මා”, “සකල බුජං” ආදී සොඳුරු ගී කළඹකි. තරු පොකුරු මැද තරු කැකුළක් සේ කලා ලොව ට ඇය ලබාදුන් ප්‍රභාවේ මහිමය එයින්ම මනාවට පැහැදිලි වේ.
පරිවර්තනය : නවෝදා දයාකාන්ත
Baby Shiromi Does It Again