නීලා වික්‍රමසිංහ

ඔබේ ලොවට හිරු වඩින තුරා….

ප්‍රභේදය : සිංහල සරල සම්භාව්‍ය, චිත්‍රපට සංගීතය

සැවොම බලාහිඳින්නේ තමාගේ ලොවට හිරු වඩිනතුරාය. නමුත් ඒ අතරින් අතළොස්සක් සෙස්සන්ගේ ලොවටද හිරු වඩිනතුරා බලාහිඳිති. නීලා වික්‍රමසිංහ යනු එවන් අපූරු චරිතයකි.

වර්ෂ 1960 මාර්තු 30 වනදා උපත ලද කුඩා බිළිඳියකි. අනාගතයේදී රටක් වසඟ කරන හඬක් බවට ඇගේ හඬ පෙරළෙතැයි එදා කිසිවෙකුත් නොසිතන්නට ඇත.

කැස්බෑව රජයේ පෞද්ගලික විද්‍යාලයේදී සංගීත ලොවට පා තැබූ ඇය මාස්ටර් වින්සන්ට් සෝමපාල, ආනන්ද ජයසිංහ, අමර අතුකෝරාළ, සරත් දසනායක, ප්‍රේමදාස මුදුන්කොටුව වැනි අතිදක්ෂ සංගීත ගුරුවරුන් රැසකගෙන් සංගීතය ඉගෙනීමට වාසනාවන්ත වූවාය.

එවකට ලංකා ගුවන්විදුලියේ ප්‍රචාරය වූ “ඇමටර් වොයිස්” නම් වැඩසටහනකි. ඇගේ හඩ මුල්වරට මෙරට වාතලයට මුසුවූයේ ඒ හරහාය. “සැඳෑ අඹරේ නිශා මල් යට” ඇගේ කුළුදුල් ගීයයි. ඇය එය ගායනා කළේ වයස අවුරුදු දහ හතක් පමණ වූ කුඩා වයසකදීය. “සැඳෑ අඹරේ නිශා මල් යට” ඩෝල්ටන් අල්විස්ගේ සොඳුරු පද පෙළකි. නාද රටා මුසුකළේ ලයනල් අල්ගමය. ඇගේ ඒ සහජ දක්ෂතාවය ඔපමට්ටම් වූයේ හින්දුස්ථානී රාගධාරී සංගීතය ඉගෙනීමෙනි. වර්ෂ 1974 වනවිට ඇය විශාරද උපාධියද දිනාගත්තාය.

අතිදක්ෂ චිත්‍රපට පසුබිම් ගී ගායිකාවක ලෙස චිත්‍රපට 67කටම මිණි කිංකිණි පරදන සොඳුරු හඬකින් ගී ගැයුවාය. අහස පොළව සේ කිසිදාක එක්නොවන පෙම් යුවළකගේ සෙනෙහසේ මහිමය හා ශෝකයේ පරතෙර “ගොළු හදවතේ”, “වියෝ ගී” ගීයට මනාව මුසුකළාය. එමෙන්ම “මාස්ටර් සර්” වැනි ගී ගයමින් විවිධ ශෛලියන්ට ගී ගැයීමට ඇති හැකියාවද සනාථ කළාය. 1989 වර්ෂයේ සිදුවූ විශ්‍රාම ගැනීමෙන් අනතුරුව විදේශගතවූ ශ්‍රී ලාංකිකයන් පිනවීමටද ගී ගැයුවාය. ගායන දිවියේ හතළිස් පස්වන වසර වෙනුවෙන් “මාස්ටර් සර්” ප්‍රසංගය රටට තිළිණ කළාය.

“සූරිය” පටිගත කිරීම් සහ නීලා සුසංයෝගය දශක ගණනාවක් ඈතට දිවෙන්නකි. එහි පළමු අදියර ලෙස “සෝන්ග්ස් ඔෆ් ඕල්ඩ් සිංහල තියටර්“ ඇල්බමය එළිදක්වන ලදි. ඉන්පසු නැවත “සූරිය” ලේබලය යටතේ හෙළයේ මහා ගාන්ධර්වයා වූ පණ්ඩිත් අමරදේවයන් සමඟ ගී ගැයුවාය. ඉන් නොනැවත වර්ෂ 1979 දී ටී.එම්. ජයරත්න සමඟ එක්ව “බෙස්ට් ඔෆ් ටී.එම්. ඇන්ඩ් නීලා“ ඇල්බමයද සංගීත ලොවට තිළිණ කළාය.

ගී ගැයීමෙන් ඔබ්බට තමාගේ දැනුමද දක්ෂතාවයද නව පරපුරට බෙදාදීමට යුහුසුළු වූ ඇය පාසල් ගුරුවරියක ලෙස වසර විසි පහක කාලයක් මුළුල්ලේ සිසු සිසුවියන්ට මඟ නොමඟ පෙන්වා දුන්නාය.

මානව දයාවෙන්, ජීව ගුණයෙන් සපිරුණු ඇය 1989 වර්ෂයේදී “යුනිසෙෆ්“ සංවිධානය සමග එක්වූයේ පෝලියෝ රෝගය ශ්‍රී ලංකාවෙන් තුරන් කිරීමේ අරමුණ සහිතවය. ඉන් නොනැවත “ද මදර්” සංවිධානය පිහිටුවා ගනිමින් දෙරණ පුරා දරු දැරියන්ට, වැඩිහිටියන්ට, වියපත් කලාකරුවන්ට මවක වූවාය.