උපත – 1947
විපත – 2009 දෙසැම්බර්
ප්‍රභේදය – බටහිර පොප් සංගීතය
‘ක්ලෝඩ් රජු‘ (King Claude) ලෙස ප්‍රකට වූ ක්ලෝඩ් ප්‍රනාන්දු අති දක්ෂ පියානෝ වාදකයෙක් සහ තනු ප්‍රබන්ධකයෙක් වූයේය. පියානෝව හා ඔහු අතර ආත්මීය සබඳතාවක් තිබුණා වැන්න. පියානෝ පුවරුව මත නිදහසේ විහිදෙන ඔහුගේ අතැඟිලි මතින් මැවෙන සංගීත රාවය අසන්නකු සිත මිහිරෙන් සංතෘප්තියට පමුණුවනු ඇත.
ක්ලෝඩ් ප්‍රනාන්දු උපන්නේ 1947 වසරේදීය. ඔහුගේ සොහොයුරියට අනුව ඔහු සංගීතයට සහජ දක්ෂතාවයක් දක්වා ඇත. අවුරුදු හතරක් තරම් කුඩා වයසේදී පවා සිය සවනත වැකුණ ගී පියානෝවෙන් නැවත ප්‍රති නිර්මාණයට ඔහුට හැකියාව තිබූ බව ඇය සිහි කරන්නේ සෙනෙහසිනි. ක්ලෝඩ් ප්‍රනාන්දු අකුරුකරණය සඳහා පිවිසෙන්නේ ශාන්ත තෝමස් විදුහලටයි. පාසල් සමයේ සිට නිහතමානීතවයෙන් අගපත්ව ප්‍රායෝගික ජීවිතයක් ගත කළ ඔහු සිය පාසල් මිතුරන් සමඟ දීර්ඝකාලීන කුළුපඟ සබඳතා පැවැත්විය.
බහුතරයක් දෙනා ඔහුව හඳුනනු ඇත්තේ 80 දශකයේදී ඔහු මෙහෙයවූ “කින්ග් ක්ලෝඩ්” (King Claude) නම් රූපවාහිනී වැඩසටහන නිසාවෙනි.එම වැඩසටහන සඳහා ඔහු නවක ගායන ශිල්පීන්ට ආරාධනා කළ අතර ඔවුන්ගේ හැකියාවන් ශ්‍රී ලාංකික ප්‍රේක්ෂකයා වෙත නිරාවරණය කිරීමට මහඟු අවස්ථාවක් උදාකර දුන්නේය. එමෙන්ම ඔහු කුඩා දරුවන් සඳහා ළමා රංගායතනයක් (Children’s Recreation School) ඇරඹූ අතර ඒ ඔස්සේ එම දරුවන්ගේ ගායන ඉදිරිපත් කිරීම් වලට ස්වාධීන රූපවාහිනී සේවය ඔස්සේත් TNL නාළිකාවේ “ලර්න් මියුසික් විත් කීන්ග් ක්ලෝඩ්” (Learn Music with King Claude: ක්ලෝඩ් සමඟ සංගීතය උගනිමු) වැඩසටහන ඔස්සේ ත් ඉඩහසර වෙන්වුණි.
අතිශය සරළ ලෙස ලියන්නේ නම් ක්ලෝඩ් ප්‍රනාන්දු වනාහි ශ්‍රේෂ්ඨ සංගීතඥයෙකි. සංගීත ක්ෂේත්‍රයේ සමකාලීනයන් හා ඔහු ඉතා සුහදව කටයුතු කළේය.ඔවුන්ගේ තනු නිර්මාණ සඳහා ඔහුගේ දායකත්වය ලබා දුන්නේ ඒ සඳහා වූ දක්ෂතමයා ඔහු වූ හෙයිනි. ලංකාවේ සිටි වේගවත්ම තනු නිර්මාපකයා ලෙස ඔහුව හැඳින්වෙන අතර අයෙකු ගීයක් මුමුණන විට එය ස්වර ප්‍රස්ථාරගත කිරීමට ඔහු සතු වූ හැකියාව වර්ණනාත්මකව විග්‍රහ කෙරෙයි.
ක්ලෝඩ් ප්‍රනාන්දු “ස්පිට්ෆයර්ස්” (Spitfires) සංගීත කණ්ඩායමේ ප්‍රධාන කීබෝඩ් වාදකයා විය. ඉන්පසු ඔහු “ක්ලෝඩ් ඇන්ඩ් ද සෙන්සේෂන්ස්” (Claude and the Sensations) නමින් සංගීත කණ්ඩායමක් ඇරඹීය. එම කණ්ඩායම විසින් වාදනය කළ නොඑලින් හොන්ටර් විසින් ගයන ලද කොළඹ පුරවරයේ සිරිය පසසන “සිටි ඔෆ් කලම්බො” (City of Colombo) නම් ප්‍රකට ගීතයේ තනු නිර්මාපකයා ක්ලෝඩ් ප්‍රනාන්දුය. ඔහු විසින් රචනා කොට, තනු නිර්මාණය කොට සංගීත අධ්‍යක්ෂණය කල ගීත අඩංගු “සිටි ඔෆ් කලම්බො” නම් ඊපී ඇල්බමය (EP Album) තැටිගත කරන ලද්දේ සූරිය රෙකෝඩ් ලේබලය යටතේය. එහි ” සිටි ඔෆ් කලම්බො” ගීතයට අමතරව සෑම් නේතන් ගයන ” අයිල් තින්ක් ඔෆ් යූ” (I’ll think of you) ගීතය, ඩෙස්මන් ද සිල්වා ගයන “සෝල් බිලීවර්” (Soul Believer) ගීතය හා නොඑලින් හොන්ටර් ගයන් “ද ගර්ල් වොස් මී” (The Girl was Me) ගීතය අන්තර්ගත විය.
ගීතයන්ට සවන් දීමට – City of Colombo by Claude & the Sensation
70 දශකයේදී සජීවී “සූරිය දැක්ම” ප්‍රසංග සඳහා සංගීත සංයෝජනය සිදුවූයේ ක්ලෝඩ් ප්‍රනාන්දු විසිනි. එමෙන්ම 1972 සැප්තැම්බර් 30 වන දින පැවති සජීවී “සූරිය දැක්ම” සඳහා පළමු සූරිය පොප් වාද්‍ය වෘන්දය මෙහෙයවන ලද්දේද ඔහු විසිනි.
ක්ලෝඩ් ප්‍රනාන්දු සිය සෞන්දර්ය රස විඥාණයත් සංගීත ශාස්ත්‍ර ඥාණයත් එක් පිඬක් කොට තැනූ ගීත රසභාව සපුරයි. ඒවා තරුණ මහලු කාගේත් රස වින්දනයට විෂය වෙයි.
ක්ලෝඩ් ප්‍රනාන්දු සිය ශිල්ප ඥාණය මතු පරපුර වෙත නිර්ලෝභීව දායාද කිරීමෙහිලා කැපවූ දයාන්විත ගුරුවරයෙකු වීය. සිසුනට ඉගැන්වීම සඳහා සරලවූත් ප්‍රායෝගිකවූත් විධික්‍රම භාවිතා කිරීම ඔහු ගුරුවරුන් අතර සුවිශේෂත්වයට පත්කළ බව ඔහුගේ ශිෂ්‍යයෙකු වූ “හිට් ෆැක්ටරි” (Hit Factory) හි සංගීත නිෂ්පාදක රංග දසනායකයන්ගේ අදහසයි. නවක ගායකයන්ගේ ශක්‍යතා හඳුනා ගත හැකි තෙවන ඇසක් ඔහු සතු වූ හෙයින් ඔවුන්ගේ කුසළතා වර්ධනයට ඔහු ලබා දුන් දායකත්වය වෙසෙසින් ඇගයුමට ලක් වේ. පෙරදිග සංගීතයට නිපුණත්වය පෑ ආර්.ජී. රොක්සාමි වැනි අග්‍රගණ්‍ය කලාකරුවන් පවා බටහිර සංගීත මූලධර්ම ක්ලෝඩ් ප්‍රනාන්දුගෙන් උගෙන ඇත.
ක්ලෝඩ් ප්‍රනාන්දු හඬ පුහුණු පාඨමාලා පැවත්වූයේය. ඒ සඳහා ඔහු සිය වසර 37ක අත්දැකීම් මුසු කරමින් නවීන මෙන්ම සාම්ප්‍රදායික ඉගැන්වුම් ශිල්පක්‍රම භාවිත කොට සිසුන්ගේ කුසළතා වර්ධනයට වෙහෙස ගත්තේය. ඔහු තම ශිෂ්‍යයන්ට බ්‍රෝඩ්වේ, අර්ධ සම්භාව්‍ය, චිත්‍රපට ගීත, ජෑස් සංගීතය වැනි විවිධ පරාසයන්හි සංගීතය ඇසුරු කිරීමට මෙන්ම වීදිකාවේ, ගුවන්විදුලියේ සහ සීඩී තැටි සඳහා ගී ගැයීමට අවස්ථාව සළසා දුන්නේය. නර්ථන හා ගායන විෂයන් තුළින් දරුවන්ගේ රුචිකත්වය හා රසඥතාව වර්ධනය කිරීම මූලික දැක්ම කොට ගනිමින් ඔහු සිය ළමා රංගායතනය නවමු මුහුණුවරකින් ඇරඹීය. හිපොප්, ලතින්, ෆියුෂන්, ජෑස්,නිදහස් ශෛලිය සහ ටොප් හැට් නර්ථනය වැනි විෂයන් මේ සඳහා ඔහු අලුතෙන් ඇතුළත් කළේය.
ක්ලෝඩ් ප්‍රනාන්දු 2009 වර්ෂයේදී වසර 62ක්ව තිබියදී අප අතරින් සදහටම සමු ගත්තේය. ඔහුගේ සංගීතය ස්පර්ශ කළ රසිකයන්ගේත් ඔහුගෙන් සංගීත නැණැස වඩාගත් සිසුන්ගේත් සිත් තුළ ක්ලෝඩ් ප්‍රනාන්දු නාමය සැමදා රැඳෙනු නිසැකය.
පරිවර්තනය : යශිනි සේනානායක