Sooriya Records Sooriya Records
Menu

සී. ටී. ප්‍රනාන්දු

උපත – 1921 ජනවාරි 28

විපත – 1977 ඔක්තෝබර් 21

ප්‍රභේදය – සිංහල පොප් සංගීතය

සිරිල් ටියුඩර් ප්‍රනාන්දු හෙවත් අප කවුරුත් හඳුනන සී. ටී. ප්‍රනාන්දු සංගීත ක්ෂේත්‍රයට අවතීර්ණ වන්නේ 1940 දශකයේ මැද භාගයේදීය. රඟදැක්වීම් කලාව සඳහා වන සිය ප්‍රතිභාව ඔහු විදහා දක්වන්නේ කුඩා කල පටන්මය. පාසල් වේදිකාවේත් ශාන්ත මරියා ශාස්ත්‍රාලයේ ගායක සමූහයේත්  ඔහු කැපී පෙනෙන චරිතයක් විය. කුඩා දරුවකු වශයෙන් ගායනය සහ නාට්‍ය කලාව සඳහා පමණක් නොව භාෂණ විලාශය හා කථිකත්වය සඳහාද ඔහු සම්මාන දිනීය.

පසු කාලීනව සී.ටී. ප්‍රනාන්දු කොළඹ ඒ.ආර්.පී. පණිවුඩ සේවයෙහි (A.R.P Messenger Service) සමූහ ගායන කණ්ඩායමේ ප්‍රධානියා (choir master) ලෙස කටයුතු කළේය. ඉන්පසු ඔහු දෙවන ලෝක යුධ සමයේ සොල්දාදුවන් පිනවීම සඳහා වූ ග්‍රෑන්ඩ් කැබරේ (Grand Cabaret) හි සාමාජිකත්වය ලැබීය.

1946 දී සී.ටී. ප්‍රනාන්දු රේඩියෝ සිලෝන් හි ගායකයෙකු ලෙස කටයුතු කිරීම ඇරඹූ අතර එහිදී ඔහුගේ ප්‍රථම ගීතය වන “පින් සිදු වන්නේ” ගීතය පටිගත කළේය. එය කුරුල්ලන් දෙදෙනෙකු තමන් සැදූ කූඩුව නොකඩන ලෙස අවට සිටින ළමුන්ගෙන් අයදින හරවත් ගීතයකි.

ගීත සඳහා තෝරා ගත් වස්තුවිෂයන් අතින් ඔහුගේ සියලුම නිර්මාණ වල පාහේ විවිධත්වය සහ අපූර්වත්වය නොමදව ගැබ් වී තිබේ.එක් ගීතයකින් යාචක කොලු ගැටයෙකු ගැන ගයන ඔහු තවත් ගීතයකින් කඩල විකුණන්නෙකු දකින ලෝකය ගැන ගයයි. ශ්‍රී ලාංකීය ජන සමාජයට සමීප ප්‍රස්තූතයන් හා එදිනෙදා සමාජයේ නිතර හමුවන පුද්ගල චරිත පාදක කර ගනිමින් ඔහු ගැයූ ගීත විචිත්‍රවත්ය. ඊටම ඔබින මටසිළුටු බස් වහරත් මධුර සංගීත සංයෝජනයත් නිසා එම ගීත සර්වකාලීන ගුණයෙන් යුක්තය. එහෙයින් එම නිර්මාණ නූතන රසිකයාගේද ආදරයට පාත්‍ර වේ.

1952 වසරේදී කාගීල්ස් සීමාසහිත සමාගමට අයත් වූ HMV ලේබලය යටතේ ඔහු රසික ආකර්ෂණය දිනාගත් ගී රැසක් පටිගත කළේය.

සී. ටී. ප්‍රනාන්දු ළමා ගී සාහිත්‍යය සුපෝෂණය කළ වැඩිහිටියෙකි. “අම්බිලි මාමේ”  ගීතය කුඩා දරුවන් වෙනුවෙන් අදටත් ගැයෙන සෞම්‍ය සුගායනයකි. රාත්‍රී කාලයේ පරිසරයේ ශෝභාව ගැන කියැවෙන “ලෝ අඩ නින්දේ” ගීතය පහ ශ්‍රේණිය පෙරදිග සංගීත විෂය නිර්දේශයට ඇතුළත් කර ඇත්තේද දරුවන්ගේ සෞන්දර්යාත්මක රස සිතුවිලි වර්ධනය කළ හැකි ගුණයෙන් එය අනූන නිසාය.

පසුව ලුවිස් බ්‍රවුන් සමාගම යටතේ ” ගෝල්ඩන් වොයිස් ඔෆ් සී.ටී. ෆනෑන්ඩු” (Golden Voice of C. T. Fernando: සී. ටී. ප්‍රනාන්දු ගේ රන් හඬ) නමින් නිකුත් කළ ගී තැටිය තවත් රසවත් ගී සමුච්ඡයක එකතුවකි. මවු සෙනෙහසෙහි ආදරණීය සිහි කැඳවුමක් වන “මා බාල කාලේ” ගීතයත් මවු සෙනෙහස වටහා නොගත් පුතෙකු ගැන කියැවෙන “සඳ වට රන් තරු” ගීතයත් මෙහි අන්තර්ගතයන්ය.

පොදු රසිකයාට විනෝදාස්වාදය ලබා දීමට සමත් ගීත සම්ප්‍රදායක් සී. ටී. ප්‍රනාන්දු බිහි කළේය.1967 දී තැටිගත කරන ලද ” පරවුන මල් නැත නැවත පිපෙන්නේ” ගීතය මීට කදිම නිදසුනකි. ගීතය අතරතුර ගීතයෙන් මුසපත් වූවන් නගන අත්පොලසන් නද සහ නොයෙක් කැ ගැසීම් ශබ්ද එක් කර තිබීමෙන් නවමු මාදිලියක ගීත කලාවක් ශ්‍රාවකයාට තිළිණ කර ඇත. දැනුදු ප්‍රිය සම්භාශන වල නිතර ගැයෙන ගීතයකි මෙය.සිල්වර් ලයින් (Silverline) තැටි සමාගම නිෂ්පාදනය කළ “සීගිරි සුකුමාලියේ” නම් ඇල්බමයේ එන සීගිරි සුකුමාලියේගීතය සීගිරි බිතු සිතුවම්හි ඇති ලලනාවන් ගැන කියැවෙන ප්‍රීතිමත් නාද ලීලාවක් සහිත වන්නකි. කුල කාන්තාවකගේ ශ්‍රීය වර්ණනා කෙරෙන “මී අඹ වනයේ” ගීතයද අර්ථ රසයෙන් හා නාද රසයෙන් මනාකොට තබන ලද්දකි.

1970 දී ජෙරල්ඩ් වික්‍රමසූරිය තෙවන සූරිය දැක්ම (Sooriya Show) සඳහා සී. ටී. ප්‍රනාන්දුව තෝරා ගත් අතර එය “සී.ටී. සූරිය ෂෝ” (C.T. Sooriya Show) ලෙස නම් විය.

Sooriya Show at Sugathadasa Indoor Stadium, December 20, 1970 L to R: Dulcie Wickremesooriya, C.T. Fernando, Mr. & Mrs. Stanley Tilakaratne with daughter, Gerald Wickremesooriya with his son
Sooriya LP CHB 013 titled ‘The Golden Voice of CT Fernando’

1977 දී සී.ටී. ප්‍රනාන්දුගේ අකල් වියෝවෙන් පසුව ඔහුගේ බිරිඳ “ද ගෝල්ඩන් වොයිස් ඔෆ් සී. ටී.” (The Golden Voice of C.T.: සී. ටී. ගේ රන් හඬ) ඇල්බමය සූරිය රෙකෝඩ් ලේබලය යටතේ නැවත ප්‍රති-නිර්මාණය කිරීමට අවසරය ලබා දුන්නාය. එමෙන්ම තරංගා රෙකෝඩ් ලේබලය යටතේ “මල් ලෝකේ රාණි” ඇල්බමයෙන් ඔහුගේ තවත් ගීත 10ක් ප්‍රති-නිර්මාණය කෙරිණි.

Dr. Sunanda Mahendra, Patrick Denipitiya and C.T. Fernando during CT’s interview for BBC in UK, 1969
At the finals of the Elasto Talent Show, St. Peter’s College Hall, 1968 L to R: Patrick Nelson, C.T. Fernando, Jean Van Heer, Ralph Menezees, Myfanwy Pompeus, Bella Carracess

සී. ටී. ප්‍රනාන්දු හුදු ගායකයෙකු පමණක් ලෙස සරළව දැක්විය නොහැක. ඔහු සිංහල ගීත සාහිත්‍යයේ යුග පුරුෂයෙකි. ගීත දහස් ගණනින් ගයා නැතිමුත් දේශාභිමානී ගීත, කිතු බැති ගීත, මවු ගුණ ගීත, ප්‍රේම ගීත, ළමා ගීත හා විනෝද ගීත ඔහුගේ ගී ගොන්න තුළ වෙයි. බටහිර ගීත ආභාශය ලබමින් එහෙත් ස්වතන්ත්‍ර තනු නිර්මාණය කර ඉන් ඔබ්බට යෑමට ඔහු ගත් උත්සාහය ප්‍රශංසනීය ය. විදග්ධ රස වින්දනය සඳහා පමණක් සීමා නොවූ එම ගීත සමස්ථ ශ්‍රී ලාංකීය ශ්‍රාවකයාව ආමන්ත්‍රණය කරයි. ඒවා සුගම ගැමි බසින් රසාලිප්තය. මනහර තනුවෙන් අනූනය. මියුරු ස්වරයෙන් ඔපවත්ය. සෞන්දර්යවාදී ජීවන දර්ශනයක් සහිත වූ මේ අපූර්වකලාකරුවාගේ ගීත තවත් යුග යුග ගණන් රසික සවන්හි ලැගුම් ගනු ඇත.

සටහන : අමායා සුරියප්පෙරුම

සංස්කරණය : නදීෂා පෝලිස්

පරිවර්තනය :  යශිනි සේනානායක

ගීත ඇල්බම

The Golden Voice of C. T. Fernando
The Golden Voice of C. T. Fernando
Sooriya Show Vol 3
error: Content is protected !!