පාංකිරිත්තා

පාංකිරිත්තා

උපහාසය හා හාස්‍ය මුසු ගී පද රචනා වර්ථමානයේ බිහිවනුයේ ඉතා කලාතුරකිනි. ප්‍රේමකීර්ති ද අල්විස් මහතා එවැනි උපහාසය හා හාස්‍ය මුසු ගී පද රචනා නිර්මාණයේ පුරෝගාමියා වූ බව සැවොම දන්නා කරුණකි. උපහාසයේ හා අපහාසයේ වෙනස හොඳින් ගැනීමට ඉවහල් වූ එවැනි ගීත වලින් සමාජයට ලැබුනේ ඉතා වටිනා පණිවුඩයක්.
.
උපහාසාත්මක ගීත ගායනයේ ප්‍රමුඛයා වුනේ ජනාදරයට පත් විකට නළු සහ ගායක ෆ්‍රෙඩී සිල්වා. “පාංකිරිත්තා, හඳමාමා උඩින් යතේ, දවසක් දා කකුළුවෙකුට මොනවද හිතිලා, අමුතු ඇඳුම් ඇඳ හඬවන රබානකි අතේ, අලුත් කලාවක් හොයාගත්ත මං දියුණුවෙන්න ඕනෑ නම්, පරණ කෝට්” වැනි උපහාසාත්මක ගීත රැසක් ෆ්‍රෙඩී සිල්වා විසින් ගායනා කලා.
.
ආදරණීය ප්‍රේම් අතින් මෙවැනි උපහාසාත්මක ගීත ලියුවුනේ ෆ්‍රෙඩී සිල්වා වෙනුවෙන් පමණක් නොවේ. මළ පොතේ අකුරු බෑ කී මිනිහා (මාලනී බුලත්සිංහල), මිනිසෙකු පිට නැගි අසරුවෙකි (සුනිල් එදිරිසිංහ), කන්ද කෙන්ද කරනු පිනිස (මාලනී බුලත් සිංහල) තවත් එවැනි ගීත කිහිපයක්.
.
මේ ගීත අතරින් “පාංකිරිත්තා” ගීතය කුඩා කාලයේ සිටම සිතෙහි රැඳුණු ගීතයක්. ඒ නිසාම ගීතයෙන් කියවෙන අවස්ථාව දළ සිතුවමකට නැගුවෙමි. ගීතයෙන් කියවෙන සියුම් උපහාසය අපි හැමෝටම වැදගත්.
…………………………………………………………………………………………………….

පාංකිරිත්තා තක්කිට තරිකිට උඩ පැන පැන නටතෙයි
පාංකිරිත්තී රබාන අරගෙන කරබාගෙන වයතෙයි
උන්ගේ පැටවුන් වටේට ඉඳගෙන දෑතින් හඬ තලතෙයි
මේවා බල බල තනි කෑඳැත්තෙක් කීචි බීචි කියතෙයි
.
පාංකිරිත්තා තමන්ගෙ පාඩුවෙ නැටුම පටන්ගත්තේ
අහල පහල කිසිවෙකුටත් ඒකෙන් හිරිහැරයක් නැත්තේ
කොහේද හිඳ පැමිණුනු කෑඳැත්තා වහලා අර අත්තේ
උන්ගෙ නැටුමට බාදා කරමින් ගීය පටන්ගත්තේ
.
පාංකිරිත්තා නැටුම නවත්තා කේන්තියෙන් ආවා
කෑඳැත්තාගේ කළු අත්තටුවෙන් අල්ලා සෙලවූවා
ඊට පස්සෙ ඌ සට සට ගාලා මොන මොනවද කීවා
ළඟට කිට්ටු වී මා ද ගොළුවතින් ඊට සවන් පෑවා
.
අනුන්ගෙ වැඩ ගැන විවේචනය කර කර ඉන්නවට වඩා
තමන් දන්න දේ හරියට කරපන් කියලා කීය හඬා……
.
ගායනය – ෆ්‍රෙඩී සිල්වා
පද රචනය – ප්‍රේමකීර්ති ද අල්විස්

Janaka Boralessa

ජනක බොරලැස්ස

Social Media

Latest posts

Leave a Reply

Your email address will not be published. Required fields are marked *.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>